茄媽孕期吃什麼？(1)

懷胎十月，對我黎講真係一個非常難忘既經歷，我諗我除左懷孕之外，從來未試過咁重咁論盡，但係果種骨肉相連心連心既感覺，絕對令我可以同種種辛酸大聲講「我願意」。

整個孕期，我一共重左10kg 左右，茄媽最常被問到，你陀小茄果陣食乜野架?點解可以長胎不長肉?以下係我既小小分享。⋯⋯

懷孕初期(1~3個月)

懷孕頭三個月可以話係最辛苦，識茄媽既朋友一定知，本人極之為食亦唔揀食，而且食量都幾大，但係我變得無心機同無胃口。雖然我冇嘔出黎，但係每日都好攰，好似大感冒食完藥咁暈下暈下，有時明明好想食果樣野，叫到埋黎完全唔想食。由於胎盤未成形，bb亦未有臍帶相連，講真，頭三個月除左涼野(豆漿都係涼)，生冷野同軟芝士(怕有李斯特菌肚屙)，有胃口的話其實乜都食得，均衡飲食最重要，當然最好就係食大量深綠色蔬菜，因為含有豐富葉酸，鈣質同蛋白質，我特別推介露筍，茄媽在整個孕期幾乎隔天就食一大束。總括黎講，呢3個月食到野又唔嘔返出黎，可以訓到天光就已經好好了。

懷孕中期(4~7個月)

終於見肚喇，胃口開始轉好，係孕婦蜜月期，茄媽本身係一名空姐，懷孕期暫時轉為喺辦公室工作，所以飲食好定時，我一定食早餐，煎蛋腸仔通心粉，午餐同晚餐都一定要有肉有菜有飯，晚餐會盡量堅持在家煮(茄爸負責)，菜單有露筍炒菇菇，翠玉瓜炒肉片，大量蔬菜，雞就選擇無激素的。湯水亦都好重要，我會煲花膠湯(骨膠原)，牛骨湯(鈣質)，總之唔係涼就可以，又係果句，一定要均衡飲食。零食方面，我一向喜歡主食，不太喜歡junk food,餐與餐之間口痕的話我會食水果，我堅持每日食3種當季既水果，車厘子，蘋果，橙，梨，藍莓，紅莓等等，總之我餓就會食。女仔最愛既甜品，適可而止啦，醫生話我地個胎盤好似個關閘，識得過濾，簡單黎講，營養就會比bb,糖呀，肥呀，就係比晒呀媽，所以記住大肚唔係大晒任食架。咖啡因飲品方面，其實一日飲一杯無所謂，我大肚前有飲開咖啡，不過大肚後就戒左，但就每日一杯檸茶，無法，太想飲了。我惟一有戒口既係貝類海鮮，包括蝦，蟹，雖然自己本身對海鮮無敏感，雖然話無科學根據，但我聽過太多case,所以為左小茄皮膚好，我搏唔過。

懷孕後期(8~10個月)
其實呢個階段個，個肚已經頂到上心口，好辛苦，有時呼吸都唔順，bb又壓住胃同膀胱，真係好唔舒服。早午晚餐我同中期一樣，堅持有菜有肉有飯有湯水，後期食肉既比例要多d,因為係bb長胎既關鍵，我連我大肚前戒左既牛肉都有食。補品方面，我冇刻意，我每日會食一匙即食燕窩補充蛋白質(有人話有雌激素，自己小心選擇)，有時燉下鮮奶花膠。9個月開始可以食涼野喇，老人家話清胎毒，西瓜，綠豆沙。。。當然又係適可而止啦!

終於打完喇。。。全部都係我在孕期既經驗，希望幫到各位準媽媽啦♡

我仲有好多好多野分享。。。下篇分享乜野好呢？我好開心開左呢個blog,多謝大家喜歡我和小茄♡

呢張係我陀住小茄7半個月影既相，諗返起。。。都覺得好奇妙♡