泵媽去旅行

泵媽去旅行

茄媽係個泵媽，小茄出生一星期埋身唔成功，就開始泵媽之路。我喺小茄3個月同6個月大分別同老公兩個人去過泰國同日本，每次都係4日 ，原因係雪奶可以雪4~5日，帶返黎比小茄飲剛剛好。由於一直堅持全人奶，去旅行前，大前提要儲足夠雪奶冰奶喺香港比小茄食。

去到當地就照返平日泵奶schedule,較鬧鐘起身， 朝早6點一次，喺酒店食早餐，出去行街中午12點再泵，晚飯前6點一泵，回酒店睡前12點再泵。因為出街泵要帶冰袋，所以我選擇返酒店泵，亦有一兩次去得太遠，我在餐廳泵都試過。雖然辛苦，但係值得，亦都好多謝茄爸一路既支持。⋯⋯

不過我比較擔心既係，我泵出黎既奶能唔能夠成功安全運送到香港又唔會變壞。今次同大家分享下泵媽去旅行要帶既野。

茄媽問朋友借左個細雪箱，即係好似你遊船河雪汽水果d，不過size 細一半，亦都可以去12 蚊店買發泡膠盒，原理一樣。

另外我亦喺12蚊店買左一包包雪種，類似買冰皮月餅，放喺入邊細細包個d雪種咁，因為細細包可以放係奶與奶之間，確保雪箱夠凍冷藏d奶。

當然一定要記得帶奶袋奶泵既用具啦。

由於泵完奶要即刻冷藏，第一，book 酒店前請send email 問清楚酒店房有冇雪櫃,第二我要係返香港前一晚叫酒店幫我將雪種雪做冰，足以冷凍雪奶返香港。第三， 泵奶用具要消毒，我就直接用水煲煲滾烚，問下酒店有冇水煲，如果冇就要自己準備一個，或者用奶樽專用消毒片。

因為要慳位，奶要一包包平放，一定要check清楚奶袋完全zip實，奶與奶，雪箱4邊都要放冰種。去到機場，我將成個雪箱封膠check in,記得叫地勤幫你貼「小心易碎」貼紙。

由離開酒店，搭飛機，搭車返到屋企，前後都有12個鐘，打開雪箱d奶仲好冰好凍。之後果幾日小茄跟返日子，飲左去旅行最早泵果d先，返香港我新鮮泵果d就全部雪做冰奶。

希望我既分享幫到想去旅行又唔知點做既泵媽，因為我當時都唔知點做，上網又唔係好多媽媽分享，所以我的起心肝寫一篇希望幫到大家。出去抖抖氣，鬆一鬆爭好遠架!調節一下心情，叉足電，返黎再有加倍力量湊Bb!大家加油!